चिरप्रतिद्वन्द्वी भारतलाई हराउँदै नेपाल बंगलादेशमा जारी साफ यू–२० महिला फुटबल च्याम्पियनसिपको फाइनलमा प्रवेश गरेको छ ।

बंगलादेशको ढाकास्थित वीर श्रेष्ठ सहिद मुस्ताफा स्टेडियममा मंगलबार भएको खेलमा भारतलाई ३–१ गोल अन्तरले पराजित गर्दै नेपाल फाइनलमा पुगेको हो ।

साविक विजेता समेत रहेको भारतबिरुद्ध पहिलो हाफमा १-० ले पछि परेको खेलमा पुनआगम जित निकाल्दै नेपाल फाइनलमा पुग्न सफल भएको हो ।

नेपालको जितमा अञ्जली चन्द, कप्तान प्रिती राई र अमिषा कार्कीले १-१ गोल गरिन भने भारतका लागि अपूर्ण नर्जरीले एक गोल गरिन् ।

खेलको २० औं मिनटमा सुमती कुमारिको पासमा भारतकी अपूर्णले गोल गरेपछि नेपाल पहिलो हाफमा १-० ले पछि परेको थियो ।

तर, ४७औँ मिनेटमा अञ्जली चन्दले नेपालका लागि बराबरी गोल गर्दै खेलमा फर्काइन् । कप्तान प्रिति राईले ६८औँ मिनेटमा पेनाल्टीमार्फत् गोल गर्दै नेपालाई २–१ को अग्रता दिलाइन् ।

अग्रता बनाएपछि भारतमाथि हाबी भएको नेपालका लागि अमिसा कार्कीले निर्धारित समय सकिन एक मिनेट बाँकी रहँदा गोल गर्दै ३–१ को जित दिलाइन् ।

यसअघि पहिलो खेलमा आयोजक बंगलादेशसाग ३-१ गोलले पराजित भएको नेपालले दोश्रो खेलमा भुटानलाई ४(० गोलले पराजित गरेको थियो ।

नेपाल फाइनलमा पुग्दा पराजित भारतले भने अब राउण्ड रोबिनको अन्तिम खेलको नजिता पर्खनुपर्ने भएको छ । समान खेलबाट ४ अंक जोडेको भारत दोश्रो स्थानमा छ ।

राउण्ड रोबिनको अन्तिम खेलमा भुटान र बंगलादेशबिच प्रतिस्पर्धा हुनेछ। बंगलादेश ४ अंक जोडेर तेश्रो स्थानमा रहेको छ भने दुवै खेलमा पराजित अंक विहीन भुटानको फाइनलमा पुग्ने सम्भावना समाप्त भईसकेको छ ।

च्याम्पियनसिपमा नेपालसहित आयोजक बंगलादेश, भारत र भुटानको सहभागिता रहेको छ । सिङ्गल राउण्ड रोबिनको आधारमा भइरहेको च्याम्पियनसिपको शीर्ष दुई टोलीले उपाधिका लागि प्रतिस्पर्धा गर्नेछ ।