महिला ओलम्पिक फुटबलको एशियाली छनोटको पहिलो चरणमा चैत २२ र २५ गते नेपाल र भियतनामबीचको खेल दशरथ रंगशालमा हुने भएको छ ।
यो समूहमा अफगानिस्तान र प्यालेस्टाइन पनि थिए तर उनीहरुले प्रतियोगिता नखेल्ने भनी नाम फिर्ता लिएपछि नेपाल र भियतनामबीच प्रतिस्पर्धा हुन लागेको छ । यो समूहको विजेता टोली दोश्रो चरणमा पुग्ने छ ।
एशियाका ७ वटा समूहमा विभाजित टिमबाट समूह विजेता दोश्रो चरणमा पुग्ने छन् ।
उत्तरकोरिया, जापान, अष्ट्रेलिया, चीन र दक्षिण कोरिया सिधै दोश्रो चरणमा पुगिसकेका छन् । यी ५ टिमसहित ७ वटा समूहका विजेता गरी १२ टिमलाई दोश्रो चरणमा ३ समूहमा विभाजन गरिने छ । समूहका विजेता र उत्कृष्ट उपविजेताबीच फेरि तेस्रो चरणको खेल हुने छ र एशियाबाट २ वटा महिला टिमले ओलम्पिक खेल्न पाउने छन् ।
अखिल नेपाल फुटबल संघ एन्फाले आज सोमबार पत्रकार सम्मेलन गरेर प्रतियोगितामा सहभागी हुन भियतनामको महिला टोली २० गते नेपाल आउने जानकारी दिएको छ ।
प्रतियोगिताको मार्केटिङ र ब्रोडकास्टिङ अधिकार एमडीएसी स्पोर्टस प्रालिलाई दिइएको एन्फाले जनाएको छ ।